1952-ci ildən bəri bağlı olan Türkiyə-Ermənistan sərhədindəki Alican keçid məntəqəsi açılışa hazırlanır
Türkiyə ilə Ermənistan arasında münasibətlərin normallaşması fonunda sərhəd-keçid məntəqəsinin açılması istiqamətində işlər sürətlə davam etdirilir.
Avantaj.media xəbər verir ki, İğdırda yerləşən və Ermənistana açılacaq Alican Sərhəd Keçid Məntəqəsində 7 kilometrlik yolun genişləndirilməsi, həmçinin yük avtomobilləri üçün dayanacağın yaradılması istiqamətində işlər aparılır.
Məlumata görə, Hava limanı qovşağında Alican Sərhəd Keçid Məntəqəsi istiqamətini göstərən yeni yol nişanları quraşdırılıb.
Sərhədin açılmasına münasibət bildirən İğdır Ticarət və Sənaye Palatasının sədri Kamil Arslan bunun bölgəyə ticarət, mədəniyyət, sosial həyat, turizm və iqtisadiyyat baxımından böyük töhfə verəcəyini vurğulayıb. K.Arslan Azərbaycan ilə Ermənistan arasındakı münaqişənin başa çatmasından sonra sərhəd-keçid məntəqəsinin açılması prosesini müsbət qarşıladıqlarını və Türkiyənin xarici siyasətini dəstəklədiklərini bildirib:
“Azərbaycan və Ermənistan arasındakı münaqişənin bitməsi ilə biz artıq sərhəd-keçid məntəqəsinin açılmasını məqbul hesab edirik. Xarici İşlər Nazirliyimizin yürütdüyü siyasəti dəstəkləyir və bunu minnətdarlıqla qarşılayırıq”.
Qeyd edək ki, hər iki ölkə arasında mövcud olan sərhəd körpüsünün də təkmilləşdirilməsi və genişləndirilməsi üçün müvafiq addımlar atılır.
Alican Sərhəd Keçid Məntəqəsi 1952-ci ildən bəri fəaliyyət göstərmir.
