Sosial şəbəkələrdə yanlış məlumatların yayılması və monitorinq çağırışı
Sosial şəbəkələr müasir dövrdə informasiya mübadiləsinin əsas platformalarından birinə çevrilib. Lakin bu platformaların açıq olması bəzən yanlış və ya təsdiqlənməmiş məlumatların sürətlə və kütləvi şəkildə yayılmasına şərait yaradır.
Bu barədə texnologiya eksperti Qədim Qədimov “Avantaj.media”ya açıqlamasında bildirib ki, sosial şəbəkələrdə yayılan məlumatların bir qismi insanlarda qorxu və çaşqınlıq yarada bilər və bu da dezinformasiyanın daha geniş auditoriyaya çatmasına səbəb olur.
Ekspertin sözlərinə görə, sosial medianın “qaranlıq tərəfi” məhz yanlış informasiyanın emosional təsir vasitəsilə yayılmasıdır:
“Bəzən insanları qorxu mühitində saxlayan yanlış məlumatlar sürətlə yayılır və istifadəçilər bunu düşünmədən paylaşaraq daha böyük informasiya xaosuna səbəb olurlar,” – deyə Q.Qədimov bildirib.
O əlavə edib ki, bu kimi halların qarşısını almaq üçün informasiya istehlakında daha diqqətli yanaşma vacibdir. Onun fikrincə, istifadəçilər xəbərləri mütləq rəsmi və etibarlı mənbələrdən yoxlamalı, yalnız ilkin mənbəyə istinad etməklə məlumatı qəbul etməlidirlər.
Qədim Qədimov həmçinin qeyd edib ki, sosial media istifadəçilərinin məlumatı filtrsiz qəbul etməsi deyil, onu analiz etməsi vacibdir. Onun sözlərinə görə, bu sahədə həm texnoloji həllər, həm də media savadlılığının artırılması mühüm rol oynayır.
Ekspert bildirib ki, sosial media platformalarının alqoritmləri bəzən manipulyasiya məqsədilə istifadə oluna bilər və bu səbəbdən dövlət və aidiyyəti qurumlar tərəfindən effektiv monitorinq mexanizmlərinin tətbiqi vacibdir:
“Mütləq şəkildə monitorinq olmalıdır. Bu, yayılan informasiyanın düzgünlüyünün qiymətləndirilməsi və informasiya portallarının məsuliyyətli fəaliyyət göstərməsi üçün vacibdir,” – deyə o vurğulayıb.
Qeyd edək ki, son illərdə sosial şəbəkələrdə dezinformasiya problemi qlobal miqyasda aktuallığını artırıb və bu istiqamətdə müxtəlif ölkələrdə tənzimləyici mexanizmlər gücləndirilir.
