“Avantaj.media” xəbər verir ki, 2026-cı il Dünya Çempionatının 1/16 final mərhələsində bu gün daha üç maraqlı qarşılaşma keçiriləcək. İspaniya Avstriya, Portuqaliya Xorvatiya, İsveçrə isə Əlcəzair millisi ilə üz-üzə gələcək.
Günün ilk oyunlarından birində İspaniya millisi Avstriya ilə qarşılaşacaq. Turnirin favoritlərindən hesab olunan ispanlar qrup mərhələsində sabit və inamlı çıxış edərək pley-offa yüksəlib. Avstriya isə intizamlı oyunu və sürətli əks-hücumları ilə diqqət çəkib. Hər iki komanda üçün 1/8 finala gedən yolda səhv etmək şansı yoxdur.
Digər maraqlı görüşdə Portuqaliya millisi Xorvatiya ilə münasibətlərinə aydınlıq gətirəcək. Təcrübəli və gənc futbolçuların vəhdətindən ibarət olan Portuqaliya növbəti mərhələyə yüksəlmək üçün favorit göstərilsə də, Xorvatiyanın böyük turnirlərdə qazandığı təcrübə bu oyunu daha da gərgin edir. Mütəxəssislər komandalar arasında taktiki mübarizənin həlledici rol oynayacağını düşünürlər.
Günün son qarşılaşmalarından birində isə İsveçrə Əlcəzairlə üz-üzə gələcək. Avropa təmsilçisi qrup mərhələsində nizam-intizamlı futbolu ilə seçilib. Əlcəzair isə əzmkar çıxışı və sürətli hücumları sayəsində pley-off mərhələsinə vəsiqə qazanıb. Afrika təmsilçisi növbəti sürprizə imza atmağa çalışacaq.
Hər üç qarşılaşmanın qalibləri dünya çempionatının 1/8 final mərhələsinə yüksələcək, məğlub komandalar isə turnirlə vidalaşacaqlar. Futbolsevərləri gün ərzində yüksək gərginlik və maraqlı mübarizə vəd edən görüşlər gözləyir.
Nazim Xeyrxəbərli
