“Mançester Siti” və “Barselona”nın keçmiş əfsanəvi hücumçusu Serxio Aquero ulduz futbolçu Xulian Alvaresin mümkün Kataloniya klubuna transferi barədə maraqlı açıqlamalar verib.
Avantaj xəbər verir ki, Aquero “Barselona”nın hazırkı maliyyə vəziyyətində bu cür böyük məbləğləri ödəməkdə çətinlik çəkəcəyi barədə gəzən şayiələrə aydınlıq gətirib.
O, müasir futbolda transferlərin pərdəarxası məqamlarından danışaraq, klubların bu cür böyük transfer haqlarını hissə-hissə ödədiyini xatırladıb.
Aquero açıqlamasında bu sözləri qeyd edib: “Aydındır ki, ‘Barselona’ Xulian Alvares üçün birdəfəyə 120, 200 və ya 300 milyon avro ödəyə bilməz, lakin klublar hər il müəyyən bir hissəni ödəmək üçün həmişə razılığa gəlirlər. ‘Barsa’ ödənişləri 5 və ya 6 ilə yaya bilər və sonda tam məbləği öhdəliyinə götürər. Heç bir klub nağd şəkildə birdəfəlik 150 milyon avro ödəmir, hətta demək olar ki, heç bir klub birdən-birə 10 və ya 20 milyonu belə bir bütöv olaraq çıxarmır, ödənişlər həmişə hissə-hissə edilir.”
