İstirahət mərkəzləri və hotellər sosial şəbəkələrdə cəlbedici görüntülərlə reklam olunur. Geniş hovuzlar, mənzərəli otaqlar, lüks şərait və münasib qiymətlər insanların seçimlərinə təsir edir.
Avantaj.media-nın araşdırmasına görə, turizm sektorunda reklam məlumatlarının faktiki xidmətlə uyğunluğu mühüm istehlakçı hüququ məsələsidir.
Müştəri əvvəlcədən müəyyən məbləğ ödəyərək otaq bron edir. Lakin obyektə çatdıqdan sonra reklamda gördüyü şəraitlə fərqli mənzərə ilə qarşılaşa bilər. Bəzi xidmətlərin qiymətə daxil olmadığı sonradan məlum ola bilər.
Digər problem rezervasiyanın ləğvi və ödənilmiş vəsaitin qaytarılması ilə bağlıdır. Müştəri səfərini ləğv etdikdə hansı şərtlərin tətbiq olunduğunu əvvəlcədən bilməlidir.
Turizm obyektləri müştəriyə təqdim etdikləri xidmətlərin xüsusiyyətlərini aydın göstərməli, əlavə ödənişləri gizlətməməlidir.
İstirahət üçün ayrılan büdcənin gözlənilməz xərclərə çevrilməsi vətəndaşın həm maddi, həm də mənəvi narazılığına səbəb olur.
