İnsan sosial varlıqdır və münasibətlərdə yaşanan inciklik, küskünlük və rədd edilmə hissi təkcə emosional deyil, həm də bioloji reaksiyalara səbəb olur. Mütəxəssislərin fikrincə, bir insanın bizdən küsmesi və ya münasibətlərin pozulması zamanı beyin bunu adi bir hadisə kimi deyil, müəyyən mənada təhlükə siqnalı kimi qəbul edə bilər.
Avantaj.media-nın araşdırmasına görə, sosial münasibətlərdə yaşanan gərginlik zamanı beyində emosiyaların idarə olunmasına cavabdeh olan bölgələr aktivləşir. Maraqlıdır ki, bəzi araşdırmalar fiziki ağrı ilə sosial rədd edilmə zamanı beynin oxşar sahələrinin fəaliyyət göstərdiyini göstərir.
Psixoloqlar bildirirlər ki, küskünlük yaşayan insanlarda stress hormonlarının səviyyəsi arta, narahatlıq və gərginlik hissi yarana bilər. Bu səbəbdən bəzən insanlar münasibətlərdəki problemləri günlərlə, hətta aylarla düşünərək həmin hadisələri yenidən yaşayırlar.
Mütəxəssislər hesab edirlər ki, açıq ünsiyyət, qarşı tərəfi dinləmək və problemləri vaxtında həll etməyə çalışmaq həm psixoloji sağlamlıq, həm də münasibətlərin qorunması baxımından vacibdir.
Çünki beyin üçün yaxın insanlarla münasibətlərin pozulması sadəcə bir inciklik deyil, eyni zamanda emosional tarazlığa təsir edən mühüm hadisə kimi qiymətləndirilə bilər. Bu səbəbdən küskünlüklərin uzun müddət davam etməsi insanın əhvalına, yuxusuna və gündəlik həyat keyfiyyətinə də mənfi təsir göstərə bilər.
