Elm və Təhsil Nazirliyi, MÜTDA və Abşeron-Xızı Regional Təhsil İdarəsi niyə susur?
Masazır qəsəbəsində yerləşən 4 saylı tam orta məktəbdə şagird və valideynlərdən pul yığılması ilə bağlı iddiaları ictimailəşdirməyimizdən sonra cəmiyyətdə ciddi müzakirələr başladı. Mövzu sosial şəbəkələrdə geniş rezonans doğurdu, yüzlərlə insan məsələyə münasibət bildirdi. Lakin bütün bunlara baxmayaraq, aidiyyəti dövlət qurumları hələ də susmağa üstünlük verir.
Söhbət Elm və Təhsil Nazirliyi, Məktəbəqədər və Ümumi Təhsil üzrə Dövlət Agentliyi (MÜTDA) və Abşeron-Xızı Regional Təhsil İdarəsindən gedir. Təhsil sahəsində nəzarət və idarəetmə funksiyalarını həyata keçirən bu qurumların ictimai maraq doğuran məsələlərə operativ reaksiya verməsi onların birbaşa vəzifələrindən biridir. Ancaq görünən odur ki, ictimaiyyəti narahat edən problemlərə münasibət bildirmək həmin qurumların prioritetləri sırasında yer almır.
Medianın və vətəndaşların gündəmə gətirdiyi iddialar qarşısında nümayiş etdirilən bu səssizlik, istər-istəməz yeni suallar yaradır. Əgər səsləndirilən iddialar həqiqətə uyğun deyilsə, niyə bununla bağlı ictimaiyyətə aydın izahat verilmir? Əgər araşdırma aparılırsa, niyə nəticələri barədə hər hansı məlumat paylaşılmır?
Elm və Təhsil Nazirliyinin ictimaiyyətlə əlaqələr üzrə məsul şəxsi Səbuhi Rzayev, Abşeron-Xızı Regional Təhsil İdarəsinin müdiri İlhamə Abdullayeva və MÜTDA rəhbərliyi bu məsələyə münasibət bildirməyi zəruri hesab etmirlərmi? Dövlət qurumlarının vəzifəsi yalnız tədbirlər keçirmək, statistik rəqəmlər paylaşmaq və hesabatlar təqdim etmək deyil. Həmin qurumlar eyni zamanda cəmiyyət qarşısında hesabatlı olmalı, ictimai narahatlıq doğuran məsələlərə aydınlıq gətirməlidirlər.
Xatırladaq ki, məsələni gündəmə gətirən şəxslərdən biri 44 günlük Vətən müharibəsi qazisi Xəyal Məmmədovdur. O, məktəbdə valideynlərdən müxtəlif adlar altında vəsait toplandığını iddia edərək aidiyyəti qurumlara müraciət olunmasını istəyib. Məsələ ictimaiyyət tərəfindən ciddi müzakirə olunsa da, təhsil sisteminə cavabdeh olan qurumlardan hələ də hər hansı rəsmi mövqe açıqlanmayıb.
Bu susqunluq isə cəmiyyətdə belə bir təəssürat yaradır ki, təhsil müəssisələrində baş verdiyi iddia olunan problemlərin araşdırılmasından daha çox, onların ictimai müzakirədən kənarda saxlanılmasına üstünlük verilir. Halbuki dövlət qurumlarının borcu yaranmış sualları cavablandırmaq, iddiaları araşdırmaq və nəticələri ictimaiyyətə təqdim etməkdir.
İctimaiyyət cavab gözləyir. Susmaq isə cavab vermək demək deyil.
Məsələyə qayıdacağıq ✍🏻
Emil Müzəffərli
