Uşaqların erkən yaşlardan idmana cəlb olunması onların həm fiziki, həm də psixoloji inkişafı üçün əvəzedilməz bir təməl formalaşdırır.
Avantaj.media-nın apardığı araşdırmaya görə idmanla məşğul olmaq uşaqlarda təkcə bədən koordinasiyasını və çevikliyi artırmır, eyni zamanda onları intizamlı, özünəinamlı və məsuliyyətli bir fərd kimi yetişdirir. Valideynlər üçün ən vacib məqam uşağın yaşına və şəxsi maraqlarına uyğun olan sahəni müəyyən etməkdir.
Kiçik yaşlarda, xüsusilə 3-5 yaş aralığında məqsəd uşağa hərəkətin sevincini aşılamaqdır. Bu dövrdə üzgüçülük, gimnastika və ya rəqs kimi növlər uşağın çeviklik bacarıqlarını inkişaf etdirərək ona öz bədənini idarə etməyi öyrədir. Uşaq məktəb yaşına çatdıqda isə idman artıq bir sosiallaşma vasitəsinə çevrilir. Bu mərhələdə komanda oyunları uşaqlara birlikdə hərəkət etməyi, bir-birinin uğuruna sevinməyi və çətinliklərlə mübarizə aparmağı öyrədir. Eyni zamanda, döyüş sənətləri və ya tennis kimi fərdi idman növləri uşağın fokuslanma bacarığını və fərdi məsuliyyət hissini gücləndirir.
Valideynlər unutmamalıdır ki, bu prosesdə əsas hədəf peşəkar idmançı yetişdirmək deyil, uşağın sağlamlıq və idman arasında əlaqə qurmasına şərait yaratmaqdır. Ancaq onu da qeyd etmək lazımdır ki, uşağı məcburi olaraq sevmədiyi bir sahəyə yönləndirmək isə əks nəticə verə bilər, ona görə də ən doğru yanaşma uşağın hansı sahəyə maraq göstərdiyini müşahidə etmək və ona seçim azadlığı verməkdir. Nəticə etibarilə, uşağın böyük həvəslə və məmnuniyyətlə məşğul olduğu hər hansı bir idman növü onun gələcək həyatında sağlam və uğurlu bir fərd kimi addımlamasına ən böyük köməkçi olacaqdır.
Elsa Abdullayeva
