Tərləmə insan orqanizminin temperaturu tənzimləməsi üçün vacib fizioloji prosesdir. Xüsusilə isti havalarda və fiziki fəaliyyət zamanı tərləmənin artması normal hesab olunur. Lakin bəzi hallarda həddindən artıq tərləmə sağlamlıqla bağlı müəyyən problemlərin xəbərçisi ola bilər.
Avantaj.media-nın araşdırmasına görə, normadan artıq tərləmə gündəlik həyatı çətinləşdirə və müxtəlif xəstəliklərlə əlaqəli ola bilər. Mütəxəssislər bildirirlər ki, heç bir fiziki aktivlik olmadan və ya sərin mühitdə belə intensiv tərləmə müşahidə olunursa, bunun səbəblərini araşdırmaq vacibdir.
Həkimlərin sözlərinə görə, həddindən artıq tərləmə qalxanabənzər vəzin fəaliyyətində pozğunluqlar, hormonal dəyişikliklər, şəkərli diabet, ürək-damar problemləri və bəzi infeksiyalarla əlaqəli ola bilər. Bəzi hallarda isə stress və həyəcan da tərləmənin artmasına səbəb olur.
Mütəxəssislər xəbərdarlıq edirlər ki, həddindən artıq tərləmə ilə yanaşı ürəkdöyünmə, səbəbsiz çəki itkisi, halsızlıq, başgicəllənmə və ya nəfəs darlığı kimi əlamətlər müşahidə edilirsə, həkim müayinəsindən keçmək vacibdir.
Araşdırmalara görə, tərləmə nəticəsində orqanizmdə maye itkisi artır. Buna görə də gün ərzində kifayət qədər su qəbul etmək və xüsusilə yay aylarında maye balansını qorumaq tövsiyə olunur.
Mütəxəssislərin fikrincə, tərləmə əksər hallarda normal proses olsa da, onun həddindən artıq olması və digər əlamətlərlə müşayiət edilməsi sağlamlıq problemlərinin göstəricisi ola bilər. Bu səbəbdən uzun müddət davam edən və narahatlıq yaradan hallara laqeyd yanaşmamaq tövsiyə edilir.
Humay Cəfərova
