Meksika Ekvadoru məğlub edərək 1/8 finala yüksəlib
“Avantaj.media” xəbər verir ki, 2026-cı il dünya çempionatının 1/16 final mərhələsində Meksika millisi Ekvador üzərində 2:0 hesablı qələbə qazanaraq növbəti mərhələyə vəsiqə əldə edib.
Azteka stadionunda keçirilən qarşılaşmaya daha inamlı başlayan meydan sahibləri ilk dəqiqələrdən topa nəzarəti ələ keçirərək rəqib qapısı qarşısında təhlükəli epizodlar yaratmağa başlayıb. Meksikanın təzyiqi 22-ci dəqiqədə bəhrəsini verib. Xulian Kinyones cərimə meydançasında yaranan qarışıqlıqdan istifadə edərək komandasını hesabda önə çıxarıb.
Buraxılan qoldan sonra Ekvador oyunda tarazlığı bərpa etməyə çalışsa da, Meksika müdafiədə etibarlı çıxış edib və rəqibə geniş imkanlar verməyib. İlk hissənin sonlarına yaxın meydan sahibləri üstünlüyünü daha da artırıb. 35-ci dəqiqədə Raul Ximenes dəqiq zərbə ilə fərqlənərək hesabı 2:0-a çatdırıb və komandası fasiləyə rahat üstünlüklə yollanıb.
İkinci hissədə Ekvador daha fəal təsir bağışlasa da, yaratdığı qol imkanlarını dəyərləndirə bilməyib. Meksika isə oyunun tempini nəzarətdə saxlayaraq üstünlüyünü qoruyub və müdafiədə səhvə yol verməyib. Qarşılaşmanın qalan hissəsində hesab dəyişməyib və final fiti ilə birlikdə Meksika azarkeşləri növbəti mərhələyə vəsiqəni qeyd ediblər.
Bu qələbə ilə Meksika 1986-cı ildən sonra ilk dəfə dünya çempionatının pley-off mərhələsində qalib gələrək 1/8 finala yüksəlib. Meydan sahibləri növbəti mərhələdə İngiltərə – Konqo Demokratik Respublikası cütünün qalibi ilə qarşılaşacaq. Ekvador isə mundialla 1/16 final mərhələsində vidalaşıb.
Nazim Xeyrxəbərli
