Dominikan Respublikasında yerləşən lüks istirahət mərkəzində baş verən güclü yanğın nəticəsində bir turist həyatını itirib, təxminən 1700 nəfər təxliyə olunub.
Avantaj.media xəbər verir ki, hadisə ölkənin məşhur turizm bölgələrindən biri olan Bayahibedə yerləşən Viva Dominicus Beach Resort kompleksində qeydə alınıb. Məlumata görə, yanğın hotelin bir hissəsini tamamilə yararsız vəziyyətə salıb.
Rəsmilər bildiriblər ki, həlak olan şəxs 46 yaşlı İtaliya vətəndaşıdır. Yanğının baş verdiyi vaxt kurortda çoxlu sayda turist olub və təhlükəsizlik məqsədilə qonaqlar təcili şəkildə ərazidən çıxarılıb.
İlkin məlumatlara əsasən, alovun sürətlə yayılmasına güclü külək və bəzi tikililərdə istifadə olunan tez alışan materiallar səbəb olub. Yanğınsöndürənlər alovu nəzarət altına almağa nail olsalar da, kurortun bir sıra binalarına ciddi ziyan dəyib.
Hadisənin başvermə səbəbləri araşdırılır. Yerli hakimiyyət orqanları və turizm rəsmiləri təxliyə edilən turistlərin təhlükəsiz yerlərə yerləşdirildiyini bildiriblər.
