Dünyanın ən bahalı ekzotik meyvəsi hansıdır ?
Dünyada yüzlərlə ekzotik meyvə yetişdirilsə də, onların arasında qiymətinə görə xüsusi seçilən meyvə Yaponiyada yetişdirilən “Yubari King” qovunudur.
“Avantaj.media”nın araşdırmasına görə, Yubari King qovunu Hokkaydo adasında xüsusi istixanalarda yetişdirilir və mükəmməl dairəvi forması, şirin dadı, ətirli quruluşu ilə tanınır. Bu meyvə Yaponiyada sadəcə qida məhsulu deyil, həm də nüfuz və hörmət rəmzi hesab olunur.
Məlumata görə, Yubari King qovunları hər il keçirilən hərraclarda rekord qiymətlərə satılır. İndiyədək iki ədəd Yubari King qovununun təxminən 45 min ABŞ dollarına alıcı tapdığı qeydə alınıb. Bu göstərici onu dünyanın ən bahalı meyvələrindən birinə çevirib.
Mütəxəssislər bildirirlər ki, yüksək qiymətin əsas səbəbi məhsulun məhdud sayda istehsal olunması, uzun və xüsusi qulluq tələb edən yetişdirmə prosesi, eləcə də Yaponiyada bahalı meyvələrin hədiyyə kimi təqdim edilməsi ənənəsidir.
Yubari King qovunu əsasən yerli bazarda satılır və dünyanın müxtəlif ölkələrinə çox məhdud sayda ixrac edilir. Bu səbəbdən onu əldə etmək həm çətin, həm də olduqca bahalı hesab olunur.
Mənsurə Şirinova
