Qəbələdə qaranlıq yol: Sürücülər ciddi təhlükə ilə üz-üzədir
Qəbələ şəhərinin mərkəzindən Bum kəndi istiqamətinə gedən avtomobil yolunda işıqlandırma sisteminin işləməməsi sürücülər üçün böyük çətinlik yaradır.
Sürücülərin bildirdiyinə görə, əvvəllər bu istiqamətdə yol işıqları müntəzəm olaraq yanır, gecə saatlarında hərəkətin təhlükəsizliyi tam təmin olunurdu. Lakin son zamanlar yol boyu işıqların sönməsi səbəbindən magistral zülmət qaranlığa bürünüb.
“Yolda görünüş məsafəsi sıfıra enib”
Təqdim olunan kadrlar gecə saatlarında sözügedən yoldakı acınacaqlı vəziyyəti aydın göstərir. Sürücülər qaranlıq yolda nəqliyyat vasitələrini idarə etməyin hər an qəza şəraiti yaratdığını qeyd edirlər:
“Əvvəllər bu yollar tam işıqlı idi, rahat və təhlükəsiz hərəkət etmək olurdu. İndi isə qaranlıqdan yolun nəinki kənarını, heç önümüzü belə aydın görə bilmirik.”
Avtomobillər yalnız öz uzaq və yaxın işıqlarına ümid etməli olurlar ki, bu da xüsusilə qarşıdan gələn nəqliyyat vasitələri ilə toqquşma riskini dəfələrlə artırır.
Sürücülər aidiyyəti qurumlardan yolun işıqlandırma sisteminin bərpa olunmasını və təhlükəsiz hərəkət şəraitinin yenidən təmin edilməsini xahiş edirlər.
