UFC dünyasında böyük maraq doğuran qarşılaşmalardan biri Konor Makqreqor və Hollouey arasında baş tutacaq döyüşdür. Hər iki idmançı fərqli üslubu, təcrübəsi və döyüş strategiyaları ilə seçilir. Bu görüş təkcə güc mübarizəsi deyil, həm də taktika, psixoloji hazırlıq və karyera baxımından mühüm sınaq hesab olunur.
Mövzu haqqında “Avantaj.media”ya müsahibəsində mütəxəssis İlkin Məmmədkərimov deyib ki, Konor Makqreqor – Maks Hollouey qarşılaşması UFC azarkeşlərinin uzun müddətdir gözlədiyi döyüşlərdən biridir:
“İlk növbədə qeyd etmək lazımdır ki, bu görüş təkcə fiziki güc deyil, həm də taktiki düşüncə və psixoloji hazırlıq baxımından böyük əhəmiyyət daşıyır. Döyüşün taleyini ilk raundlardakı temp, məsafənin düzgün idarə olunması, zərbələrin dəqiqliyi və idmançıların fiziki hazırlıq səviyyəsi müəyyən edə bilər. Makqreqorun əsas üstünlüyü onun partlayıcı hücumları, sol əlinin yüksək dəqiqliyi və rəqibi erkən mərhələdə nokauta göndərə biləcək zərbə gücüdür. O, rəqib üzərində psixoloji təzyiq yaratmağı da bacaran döyüşçüdür. Əgər Makqreqor ilk raundlarda istədiyi tempi diktə edə bilsə, bu, onun xeyrinə ciddi üstünlük yarada bilər. Digər tərəfdən, Hollouey UFC-nin ən dözümlü və texniki döyüşçülərindən biridir. O, yüksək tempdə uzun müddət mübarizə aparmağı, kombinasiyalı zərbələr endirməyi və döyüş irəlilədikcə rəqibini yormağı bacarır. Əgər Hollouey ilk raundlarda Makqreqorun təhlükəli hücumlarından yayınaraq döyüşü sonrakı raundlara daşıya bilsə, onun qələbə şansı əhəmiyyətli dərəcədə arta bilər. Ümumilikdə, bu qarşılaşmada favorit müəyyən etmək asan deyil. Makqreqorun erkən nokaut potensialı ilə Holloueyin dözümlülüyü və texniki üstünlüyü arasında maraqlı mübarizə gözlənilir. Az səhv edən, taktiki plana daha yaxşı əməl edən və fiziki hazırlığını sonadək qoruyan döyüşçünün qalib gəlmək ehtimalı daha yüksəkdir”.
Nazim Xeyrxəbərli
