Quba şəhəri Azad Məmmədov adına 2 nömrəli təbiət fənləri təmayüllü məktəb-liseyin direktoru Lalə Bədəlova ilə bağlı cinayət işi başlanıldığı bildirilir.
Avantaj.media xəbər verir ki , Sərhəd.Az-a təqdim olunan Quba Rayon Prokurorluğunun qərarına əsasən, məktəbdə aparılmış araşdırmalar zamanı bir sıra maliyyə pozuntularına dair məlumatların müəyyən edildiyi qeyd olunur. Qərarda göstərilir ki, tədris edilməyən dərs saatlarına görə əməkhaqqı hesablanaraq ödənilməsi, keçirilməyən fərdi dərslər və dərsdənkənar məşğələlər üzrə əsassız ödənişlərin həyata keçirilməsi, eləcə də dövlət əmlakının mənimsənilməsi əlamətləri ilə bağlı faktlar araşdırılıb.
Sənədə əsasən, fakt üzrə Azərbaycan Respublikası Cinayət Məcəlləsinin 179.2.3 və 179.2.4-cü maddələri ilə cinayət işinin başlanmasına qərar verilib və ibtidai istintaqın aparılması müstəntiqə həvalə olunub.
Bununla yanaşı, valideynlər məktəbdə son zəng tədbiri ilə əlaqədar da pul yığıldığını iddia edirlər. Onların sözlərinə görə, 11-ci sinifdə təhsil alan 25 şagirddən hər birindən 95 manat vəsait toplanıb.
Valideynlər həmçinin bildirirlər ki, “WhatsApp” qruplarında sinif rəhbərinə qızıl hədiyyə alınması məqsədilə əlavə pul yığımı aparılır və müxtəlif məbləğlərdə ödənişlər tələb olunur.
Qeyd edək ki, cinayət işinin başlanması şəxsin təqsirli hesab edilməsi anlamına gəlmir. Təqsirləndirilən şəxsin günahkar olub-olmamasına yalnız məhkəmənin qanuni qüvvəyə minmiş hökmü ilə qiymət verilə bilər.
Yazıda qeyd olunan məlumatlar rəsmi sənəd və valideynlərin müraciətləri əsasında hazırlanıb. Qarşı tərəfin mövqeyini dərc etməyə hazırıq.
