Sarıkök əsrlərdir həm mətbəxdə, həm də xalq təbabətində istifadə olunan ən faydalı ədviyyatlardan biri hesab olunur. Tərkibindəki kurkumin maddəsi sayəsində orqanizmə bir sıra müsbət təsirlər göstərdiyi bildirilir.
Avantaj.media nın araşdırmasına görə , mütəxəssislərin fikrincə, sarıkökün müntəzəm və normada istifadəsi sağlamlığın qorunmasına dəstək ola bilər. Sarıkök güclü antioksidant xüsusiyyətlərə malikdir. Bu xüsusiyyət orqanizmdə hüceyrələrin zədələnməsinin qarşısını almağa və sərbəst radikalların təsirini azaltmağa kömək edir.
Araşdırmalar göstərir ki, sarıkök iltihabəleyhinə təsirə malikdir. Bu səbəbdən o, bəzi oynaq problemləri və iltihabi proseslər zamanı dəstək məqsədilə istifadə olunur.
Mütəxəssislər qeyd edirlər ki, sarıkök həzm sisteminin fəaliyyətinə də müsbət təsir göstərə bilər. O, həzmi asanlaşdırmağa və bəzi mədə-bağırsaq narahatlıqlarının azalmasına kömək edə bilər.
Bundan əlavə, sarıkökün immun sistemini gücləndirməyə dəstək verdiyi, ürək-damar sağlamlığının qorunmasına töhfə göstərə biləcəyi bildirilir. Bəzi elmi tədqiqatlarda onun beyin fəaliyyətinə müsbət təsirləri də araşdırılır.
Lakin həkimlər xəbərdarlıq edirlər ki, hər bir qida məhsulu kimi sarıkök də normadan artıq istifadə edilməməlidir. Xüsusilə müəyyən dərman preparatları qəbul edən şəxslər və xroniki xəstəlikləri olan insanlar sarıkökdən müalicə məqsədilə istifadə etməzdən əvvəl həkimlə məsləhətləşməlidirlər.
Mütəxəssislərin fikrincə, gündəlik qidalanmada ölçülü şəkildə istifadə olunan sarıkök həm yeməklərə xüsusi dad qatır, həm də sağlamlığın qorunmasına faydalı təsir göstərə bilər.
