Son illərdə yeniyetmə və gənclərin gündəlik ünsiyyətində “abi”, “qaqaş”, “brat”, “bro” və digər müraciət formalarının istifadəsi geniş yayılıb. Sosial şəbəkələrin və xarici mədəni təsirlərin artması bu cür ifadələrin danışıq dilində daha çox işlədilməsinə səbəb olub.
Avantaj.media nın araşdırmasına görə , mütəxəssislər bu tendensiyanın Azərbaycan dilinə təsiri ilə bağlı fərqli fikirlər səsləndirirlər.
Dilçilərin sözlərinə görə, hər bir dil zamanla yeni sözlər qəbul edir və canlı inkişaf prosesi keçir. Gənclər arasında istifadə olunan bəzi ifadələr ünsiyyəti daha səmimi və qeyri-rəsmi etsə də, onların həddindən artıq işlədilməsi ana dilində mövcud olan müraciət formalarının arxa plana keçməsinə səbəb ola bilər.
Mütəxəssislər bildirirlər ki, “qardaş”, “dost”, “yoldaş” kimi Azərbaycan dilinə məxsus sözlərin yerini xarici mənşəli ifadələrin tutması xüsusilə gənc nəslin nitq mədəniyyətinə təsirsiz ötüşmür. Bu hal uzunmüddətli perspektivdə dilin lüğət tərkibində müəyyən dəyişikliklər yarada bilər.
Digər tərəfdən, bəzi ekspertlər hesab edirlər ki, bu tip sözlər əsasən danışıq dilində istifadə olunur və ədəbi dil üçün ciddi təhlükə yaratmır. Onların fikrincə, əsas məsələ gənclərin rəsmi və qeyri-rəsmi ünsiyyət arasındakı fərqi bilməsi və hər mühitdə uyğun dil üslubundan istifadə etməsidir.
Mütəxəssislər vurğulayırlar ki, Azərbaycan dilinin zənginliyinin qorunması üçün ailə, məktəb və media mühüm rol oynayır. Gənclərin ana dilində düzgün danışmağa təşviq edilməsi, klassik və müasir Azərbaycan ədəbiyyatına marağın artırılması dil mədəniyyətinin inkişafına töhfə verə bilər.
Qeyd olunur ki, dillər daim dəyişsə də, milli kimliyin əsas sütunlarından biri olan ana dilinin qorunması və zənginləşdirilməsi cəmiyyətin hər bir üzvünün üzərinə düşən vacib vəzifələrdən biridir.
