“Zira Port” ərazisindən gecə saatlarında qum daşınması davam edir – aidiyyəti qurumlar niyə susur ?
“Zira Port” dəniz limanı ərazisindən qum daşınması ilə bağlı iddialar yenidən gündəmə gəlib.
“Avantaj.media”nın əldə etdiyi 11 avqust tarixində, gecə saat 00:00–01:00 radələrində qeydə alınan görüntülərdə ağır tonnajlı yük avtomobillərinin liman ərazisinə boş daxil olduğu, daha sonra isə qumla yüklənərək ərazini tərk etdiyi görünür.
Məsələnin diqqət çəkən tərəfi isə qum daşınmasının gecə saatlarında həyata keçirilməsidir. Sözügedən ərazidən qum daşınması ilə bağlı iddialar daha əvvəl də mətbuatda geniş işıqlandırılıb.
Burada bir sıra suallar ortaya çıxır: Ərazidən qumun daşınması qanuni əsaslarla həyata keçirilirmi? Yük avtomobillərinə qum yüklənməsinə hansı qurum tərəfindən icazə verilib? Ərazidən çıxarılan qumun həcmi və təyinatı ilə bağlı hər hansı nəzarət həyata keçirilirmi?
Ən əsas sual isə Ekologiya və Təbii Sərvətlər Nazirliyinin və digər aidiyyəti qurumların bu məsələ ilə bağlı hansı tədbirləri görməsidir.
Əgər sözügedən fəaliyyət qanun çərçivəsində həyata keçirilirsə, aidiyyəti qurumların bunu ictimaiyyətə açıqlaması vacibdir. Əks halda, qanunsuz qum hasilatı və daşınması ilə bağlı iddialar araşdırılmalı və nəticəsi barədə ictimaiyyət məlumatlandırılmalıdır.
“Avantaj.media” olaraq məsələni diqqətdə saxlayacaq, aidiyyəti qurumların mövqeyini dərc etməyə hazırıq.
Məsələyə qayıdacağıq. ✍🏻
