Boşanma zamanı uşaqların psixoloji durumuna xüsusi diqqət yetirilməlidir – Psixoloq
Ailədaxili münasibətlərin pozulması və boşanma prosesi ən çox uşaqların psixoloji vəziyyətinə təsir edən amillərdən biri hesab olunur. Lakin mütəxəssislər bildirirlər ki, valideynlər ayrılıq prosesini düzgün idarə etdikdə uşaqların ciddi psixoloji travma yaşamasının qarşısını almaq mümkündür.
Bu barədə psixoloq Fərqanə Mehmanqızı Avantaj.media-ya danışıb.
Psixoloqun sözlərinə görə, ilk növbədə valideynlər boşanma mədəniyyətinə riayət etməli və ayrılıq prosesini qarşılıqlı hörmət çərçivəsində həyata keçirməlidirlər.
“Əgər valideynlər ayrılığı düzgün şəkildə idarə etsələr, uşaqda ağır travmaların yaranma ehtimalı azalacaq. Uşağa izah edilməlidir ki, valideynlərin ər-arvad münasibəti başa çatsa da, onların ana və ata olmaq məsuliyyəti dəyişmir. Uşaq bilməlidir ki, hər iki valideyn bundan sonra da onun yanında olacaq və ona dəstək göstərəcək”, – deyə o bildirib.
Fərqanə Mehmanqızı qeyd edib ki, valideynlərin uşağın yanında bir-birini təhqir etməsi, günahlandırması və ya uşağı qarşı tərəfə qarşı vasitə kimi istifadə etməsi ciddi mənfi nəticələrə səbəb ola bilər.
“Uşağın yanında valideynlərdən biri digərinin ünvanına mənfi fikirlər səsləndirirsə, bu, uşağın psixologiyasına ciddi təsir göstərir. Hər bir valideyn özünü uşağın yerinə qoymalı, empatiya qurmalıdır. Çünki uşaq üçün həm ana, həm də ata dəyərlidir”, – deyə psixoloq vurğulayıb.
Mütəxəssis hesab edir ki, valideynlər ayrılıq səbəblərindən asılı olmayaraq övladlarının gələcəyini və psixoloji sağlamlığını hər zaman ön planda saxlamalıdırlar.
Onun sözlərinə görə, evlənərkən necə etik dəyərlərə önəm verilirsə, ayrılarkən də həmin prinsiplər qorunmalıdır.
Psixoloq əlavə edib ki, tərəflər bu prosesin öhdəsindən təkbaşına gələ bilmədikdə mütləq peşəkar dəstəyə müraciət etməlidirlər.
“Valideynlər və uşaqlar bu mərhələni mümkün qədər az psixoloji zərərlə keçirməlidirlər. Bunun üçün lazım gəldikdə psixoloq və digər mütəxəssislərin köməyindən istifadə olunmalıdır”, – deyə Fərqanə Mehmanqızı bildirib.
