Texnologiyanın inkişafı ilə səsli kitablar müasir oxucuların, xüsusilə də vaxtı məhdud olan gənclərin və tələbələrin həyatında mühüm yer tutmağa başlayıb.
Kitabxanaçı Nigar Qasımzadə məsələ ilə bağlı “Avantaj Media”ya açıqlamasında bildirir ki: “Səsli kitablar xüsusilə dinamik həyat tərzi sürən insanlar üçün mükəmməl alternativdir. Onlar yolda, idmanda və ya gündəlik işlərlə məşğul olarkən vaxtı səmərəli dəyərləndirməyə kömək edir. Eyni zamanda, tələffüzün və dinləmə bacarıqlarının inkişafında, eləcə də görmə məhdudiyyəti olan şəxslərin elmə əlçatanlığında səsli kitabların rolu əvəzsizdir.
Lakin unutmamaq lazımdır ki, səsli format kağız kitabın verdiyi dərin fokuslanma və vizual yaddaş faktorunu tam əvəz edə bilmir. Səsli kitablar audio-vizual qavrayışı gücləndirir və informasiyanı daha sürətli mənimsəməyə şərait yaradır.
Xüsusilə böyük həcmli bədii əsərləri və ya şəxsi inkişaf kitablarını dinləmək gənclərin dünyagörüşünün artırılmasında böyük üstünlükdür. Həm ənənəvi kağız kitabları oxumaq, həm də boş zamanlarda səsli kitablardan yararlanmaq mütaliə vərdişini daimi saxlamağın ən effektiv yoludur”.
