Biləsuvarda Azərbaycan Polisinin yaranmasının 108-ci ildönümü münasibətilə tədbir keçirilib.
“Avantaj.media” xəbər verir ki, tədbirdən əvvəl Biləsuvar Rayin İcra Hakimiyyətinin başçısı, rayon polis şöbəsinin rəhbərliyi və şəxsi heyəti, rayonun hüquq-mühafizə orqanlarının rəhbər şəxsləri, dövlət qurumlarının rəhbərləri və ictimaiyyət nümayəndələri Ulu Öndərin Biləsuvarda ucaldılmış abidəsini ziyarət edərək önünə gül dəstəsi düzüblər, Ümummilli Liderin xatirəsinə ehtiram ifadə olunub.
Biləsuvar rayon Heydər Əliyev Mərkəzində keçirilən tədbirdə rayonun rəhbər şəxsləri və polis əməkdaşları ilə yanaşı veteranlar, Polis Akademiyasına qəbul olunmaq üçün müraciət etmiş abuturiyentlər də iştirak ediblər.
Biləsuvar RPŞ-nin rəisi, polis polkovniki Nəsib Məmmədov Azərbaycan Polisi Günü münasibətilə tədbir iştirkçılarını təbrik edib və daxili işlər naziri general-polkovnik Vilayət Eyvazovun polis əməkdaşlarına ünvanlanmış təbrikini çatdırıb.
O bildirib ki, Ulu Öndər Heydər Əliyevin 24 may 1998-ci ildə 710 nömrəli Fərmanına əsasən hər il 2 iyul tarixi Azərbaycan Polisi Günü kimi qeyd edilir. Azərbaycan polisi ötən dövrdə şərəfli yol keçib, ölkəmizdə müstəqilliyin və daxili sabitliyin təmin olunmasında mühüm rol oynayıb.
Ulu Öndər Heydər Əliyevin rəhbərliyi ilə aparılan hüquqi islahatların nəticəsi olaraq, polis vahid hüquq-mühafizə orqanı kimi formalaşıb. Hazırda dövlət başçısının diqqət və qayğısı sayəsində davamlı inkişafda olan daxili işlər orqanları ölkədə cinayətkarlığa, onun transmilli növlərinə qarşı mübarizədə, asayişin və təhlükəsizliyin təmin olunmasında önəmli xidmətləri ilə seçilir. Prezident, Ali Baş Komandan İlham Əliyevin rəhbərliyində böyük qələbə ilə nəticələnən 44 günlük Vətən müharibəsində Daxili İşlər Nazirliyinin hərbi qulluqçuları vahid komandanlıq altında xüsusi qəhrəmanlıq göstərib.
Daha sonra digər tədbir iştirakçıları çıxış edərək Azərbaycan polisinin dövlətimizin möhkəmlənməsindəki rolundan və inkişaf yolundan bəhs ediblər.
Bundan sonra xidmətdə fərqlənən polis əməkdaşlarına Fəxri Fərmanlar və mükafatlar təqdim edilib.
Tədbirdən sonra Biləsuvarın ən böyük yaşayış məntəqələrindən olan Xırmandalı kəndində yeni inşa edilmiş 5 saylı inzibati ərazinin sahə məntəqəsinin binasının açılışı olub. Açılışda kənd ziyalıları, ağsaqqallar, rayon rəhbərliyi və ictimaiyyət nümayəndələri iştirak ediblər.
