Fransa İsveçi darmadağın edərək 1/8 finala yüksəlib
“Avantaj.media” xəbər verir ki, 2026-cı il dünya çempionatının 1/16 final mərhələsində Fransa millisi İsveç üzərində 3:0 hesablı inamlı qələbə qazanaraq adını turnirin 1/8 finalına yazdırıb.
Matça fəal başlayan Didye Deşamın komandası üstünlüyünü erkən dəqiqələrdən hiss etdirib. Fransa hesabı 16-cı dəqiqədə Kilian Mbappenin dəqiq zərbəsi ilə açıb. Qoldan sonra da təşəbbüsü əldən verməyən fransızlar topa daha çox nəzarət edib, İsveç isə əsasən əks-hücumlara bel bağlayıb. İlk hissədə hesab dəyişməyib və komandalar fasiləyə Fransanın minimal üstünlüyü ilə yollanıblar.
İkinci hissədə Fransa təzyiqi daha da artırıb. 53-cü dəqiqədə Bredli Barkola komanda yoldaşının ötürməsini qola çevirərək fərqi iki topa çatdırıb. Buraxılan qollardan sonra irəli atılan İsveç bir neçə təhlükəli hücum təşkil etsə də, Fransa müdafiəsi və qapıçısı rəqibə fərqlənmək imkanı verməyib.
Matçın yekun nöqtəsini isə Kilian Mbappe qoyub. Ulduz hücumçu 76-cı dəqiqədə dubla imza ataraq həm özünün ikinci, həm də komandasının üçüncü qolunu vurub. Qalan dəqiqələrdə hesab dəyişməyib və Fransa inamlı qələbə ilə növbəti mərhələyə yüksəlib.
Qarşılaşma ərzində topa nəzarətdə, qol epizodlarının yaradılmasında və hücumların təşkilində üstün olan Fransa favorit statusunu doğruldaraq turnirin əsas iddiaçılarından biri olduğunu bir daha nümayiş etdirib. İsveç isə göstərdiyi səylərə baxmayaraq, rəqibin sürətli hücumları qarşısında aciz qalıb və dünya çempionatı ilə vidalaşıb.
Bu nəticədən sonra Fransa millisi 1/8 final mərhələsində Paraqvayla qarşılaşacaq. İsveç isə mundialdakı çıxışını 1/16 final mərhələsində başa vurub.
Nazim Xeyrxəbərli
