“Avantaj.media”nın araşdırmasına görə, dənizdə boğulma halları əksər insanların düşündüyündən fərqli olaraq səssiz şəkildə baş verir. Filmlərdə göstərilən kimi qışqırmaq və ya kömək üçün əl yelləmək əvəzinə, boğulan insanın davranışında diqqət tələb edən bir sıra əlamətlər müşahidə olunur. Bu əlamətləri vaxtında tanımaq insan həyatını xilas edə bilər.
Mütəxəssislərin sözlərinə görə, boğulma zamanı insanın əsas məqsədi nəfəs almaq olur. Bu səbəbdən o, danışa, qışqıra və ya kömək istəyə bilmir. Nəticədə ətrafdakılar təhlükəni gec fərq edə bilirlər.
Boğulma təhlükəsini göstərən əsas əlamətlər bunlardır:
Başın suyun səthində aşağı vəziyyətdə olması, ağızın isə qısa müddətlik suyun üzərinə çıxması;
Gözlərin boş baxması və ya göz qapaqlarının bağlı olması;
Saçların üzə yapışması və insanın onları kənara çəkməməsi;
Bədənin şaquli vəziyyətdə qalması, ayaqlarla üzmə hərəkətlərinin olmaması;
Qolların yanlara açılaraq suyu aşağı itələməyə çalışması;
Başın tez-tez geriyə atılması və nəfəs almağa cəhd edilməsi.
Mütəxəssislər bildirirlər ki, bu əlamətlər görünən kimi ilk növbədə xilasediciyə məlumat vermək lazımdır. Hazırlıqsız şəkildə boğulan şəxsi xilas etməyə çalışmaq əlavə təhlükə yarada bilər. Belə hallarda xilasedici dairə, ip və ya suyun üzərində qala bilən hər hansı əşyadan istifadə etmək daha təhlükəsiz hesab olunur.
Boğulma cəmi bir neçə saniyə ərzində faciə ilə nəticələnə bilər. Bu səbəbdən çimərliklərdə diqqətli olmaq, uşaqları nəzarətsiz buraxmamaq və yalnız xilasedici xidmətinin fəaliyyət göstərdiyi ərazilərdə çimmək tövsiyə edilir.
Mələk Nəsirli
