İnsan səsi niyə telefonda özümüzə fərqli gəlir ?
“Avantaj.media”nın nəzərdən keçirdiyi akustik məlumatlara görə, insanın öz səsini səs yazısında fərqli eşitməsinin əsas səbəblərindən biri danışarkən səsi həm hava, həm də kəllə sümükləri vasitəsilə qəbul etməsidir.
İnsan danışarkən səs telləri titrəyir və yaranan səs havada yayılaraq qulağa çatır. Bununla yanaşı, həmin titrəyişlərin bir hissəsi kəllə sümükləri vasitəsilə daxili qulağa ötürülür.
Bu iki yol birlikdə insanın öz səsini necə eşitməsinə təsir edir. Sümük keçiriciliyi müəyyən aşağı tezliklərin daha güclü qəbul edilməsinə səbəb olduğundan insan öz səsini real həyatda daha dərin və fərqli eşidə bilər.
Telefon və ya diktofon isə əsasən havada yayılan səsi mikrofon vasitəsilə qeydə alır. Buna görə də yazını dinləyərkən beynimizin öyrəşdiyi daxili səs siqnalı olmur.
BBC-nin elmi izahında da insanın öz səsini danışarkən iki fərqli yolla eşitdiyi və səs yazısında sümük keçiriciliyinin olmamasının səsin daha fərqli qəbul edilməsinə səbəb olduğu izah edilir.
Bu səbəbdən səs yazısında səsin daha yüksək, nazik və ya tanımadığımız bir insana aidmiş kimi gəlməsi normaldır.
Maraqlıdır ki, insan öz səsini tez-tez yazılardan dinlədikcə bu fərqli səsə alışa bilər. Yəni problem səsin “dəyişməsi” deyil, beynin iki fərqli səs qəbul etmə üsulunu müqayisə etməsidir.
Mütəxəssislərin fikrincə, səs yazısında eşitdiyimiz səs başqalarının bizi eşitdiyi səsə daha yaxın olsa da, mikrofon, telefonun səs emalı və akustik mühit də nəticəyə təsir edə bilər.
Mələk Nəsirli
