Mağaza rəflərində onlarla fərqli şampun arasında seçim edərkən diqqət çəkən ifadələrdən biri də “sulfatsız” yazısıdır. Son illərdə bu məhsullara maraq artsa da, sulfatlı şampunların saça zərərli olub-olmaması ilə bağlı müzakirələr davam edir. Bəs sulfat nədir və bu tərkibli şampunların xüsusiyyətləri nələrdir?
“Avantaj.media”nın araşdırmasına əsasən, sulfat şampunların tərkibində yer alan təmizləyici maddədir. Onun əsas vəzifəsi saç və baş dərisində yığılan yağ, kir, toz və istifadə olunan saç baxım məhsullarının qalıqlarını effektiv şəkildə təmizləməkdir. Məhz buna görə sulfatlı şampunlar bol köpüklənməsi və güclü təmizləmə xüsusiyyəti ilə seçilir. Mütəxəssislərin sözlərinə görə, bu tip şampunlar xüsusilə yağlı saçlara sahib olan insanlar üçün daha uyğun hesab edilir. Lakin onların tez-tez istifadəsi bəzi hallarda baş dərisinin təbii yağ balansını poza, saç tellərində quruluq yarada və həssas dəridə qıcıqlanmaya səbəb ola bilər. Bundan əlavə, boyalı saçlarda rəngin daha tez solması da sulfatlı məhsulların mümkün təsirləri arasında göstərilir.
Bununla belə, dermatoloqlar sulfatların hər kəs üçün zərərli olduğu fikrini doğru hesab etmirlər. Onların sözlərinə görə, sağlam baş dərisinə sahib insanlar üçün sulfatlı şampunlardan istifadə ümumiyyətlə təhlükə yaratmır. Şampun seçimi isə saçın tipi, baş dərisinin həssaslığı və fərdi ehtiyaclara uyğun edilməlidir.
Mələk Nəsirli
