Məşhur reper “Desiigner” (əsl adı Sidney Royel Selbi III) ABŞ-nin Cənubi Karolina ştatında həbs edilib.
Avantaj.media xəbər verir ki, bu barədə “Billboard” məlumat yayıb.
Sənətçi məişət zorakılığında ittiham olunur. Hazırda o, girov müqabilində azad edilmək hüququ olmadan həbsdə saxlanılır.
Reperə qarşı heyvana qəsdən zərər vurma və 2-10 min dollar dəyərində şəxsi əmlaka ziyan vurma ittihamları da irəli sürülüb. Bu maddələrin hər biri üzrə maksimum cəza 5 il həbsdir.
Polis hesabatına görə, “Desiigner” sevgilisi və övladının anası ilə televizorlarla bağlı mübahisə edib. İddialara əsasən, reper qadının telefonlarını çəkiclə sındırıb.
Qadın uşağı ilə birlikdə qonşunun evinə sığınıb və vanna otağında gizlənib. “Desiigner” isə evə daxil olmağa çalışarkən qonşunun avtomobilinə və evinə zərər vurub.
Qeyd edək ki, bu, reperin ilk hüquqi problemi deyil. O, martda da Cənubi Karolinada məişət zorakılığı ittihamı ilə saxlanılmış və 1500 dollar girov ödədikdən sonra sərbəst buraxılmışdı. Bundan əvvəl isə 2023-cü ildə təyyarədə nalayiq davranışda ittiham olunmuşdu.
