Ali Məhkəmədən sələmçilərə xəbərdarlıq: Bu fəaliyyət hüquqi məsuliyyət yarada bilər
Avantaj xəbər verir ki, müxtəlif şəxslərə mütəmadi olaraq gəlir əldə etmək məqsədilə faizlə borc verilməsi sadə borc münasibəti kimi qiymətləndirilməyə bilər. Belə fəaliyyət müəyyən hallarda qanunsuz sahibkarlıq fəaliyyəti hesab edilərək hüquqi məsuliyyət yarada bilər.
Ali Məhkəmənin mövqeyinə əsasən, şəxsin davamlı şəkildə müxtəlif insanlara faiz qarşılığında borc verməsi və bundan sistemli gəlir əldə etməsi qanunvericilik baxımından araşdırma predmeti ola bilər.
Bu fəaliyyətin qanunsuz olduğu müəyyənləşdirildiyi təqdirdə, şəxsin inzibati və ya cinayət məsuliyyəti ilə üzləşməsi mümkündür.
Mütəxəssislər faizlə borc münasibətlərinin yazılı müqavilə əsasında rəsmiləşdirilməsini, verilən vəsaitin və həyata keçirilən ödənişlərin isə müvafiq sənədlərlə təsdiqlənməsini tövsiyə edirlər.
Ali Məhkəmənin mövqeyinə görə, borcvermə fəaliyyətinin qanunsuz olduğu müəyyən edilərsə, borc verənin faiz və digər əlavə məbləğləri tələb etmək imkanları da məhdudlaşdırıla bilər.
Beləliklə, fiziki şəxslər arasında borc münasibətlərində faiz tətbiq edən şəxslərin fəaliyyətin xarakterinə və qanunvericiliyin tələblərinə diqqət yetirməsi vacibdir.
