Smartfonlar gündəlik həyatımızın ayrılmaz hissəsinə çevrilib. Lakin bir çox istifadəçi telefonunun batareyasının niyə əvvəlki kimi uzunömürlü olmadığını anlamır. Mütəxəssislərin fikrincə, əksər hallarda bunun səbəbi istehsal qüsuru deyil, gündəlik istifadə zamanı edilən səhvlərdir. Yanlış enerji doldurma vərdişləri, yüksək temperatur və keyfiyyətsiz aksesuarlar batareyanın ömrünü əhəmiyyətli dərəcədə azalda bilər.
“Avantaj.media”nın araşdırmasına görə, müasir smartfonların böyük əksəriyyətində litium-ion batareyalar istifadə olunur. Bu batareyalar uzunömürlü olsa da, düzgün istifadə edilmədikdə tutumu tədricən azalır. Ən çox rast gəlinən səhvlərdən biri telefonun batareyasını mütəmadi olaraq 0 faizə qədər boşaltmaqdır. Mütəxəssislər bildirirlər ki, batareyanın enerji səviyyəsini əsasən 20-80 faiz aralığında saxlamaq onun daha uzun müddət sağlam qalmasına kömək edir.
Digər geniş yayılmış yanlışlıq telefonu uzun müddət 100 faiz dolu vəziyyətdə şarj cihazına qoşulu saxlamaqdır. Yeni nəsil cihazlarda enerji idarəetmə sistemləri inkişaf etsə də, saatlarla yüksək enerji səviyyəsində qalmaq batareyanın kimyəvi quruluşuna əlavə yük yarada bilər. Buna görə də gecəboyu fasiləsiz enerji doldurmaq əvəzinə optimallaşdırılmış şarj funksiyalarından istifadə etmək tövsiyə edilir.
Telefonun həddindən artıq isinməsi də batareyanın əsas düşmənlərindən hesab olunur. Günəş altında uzun müddət istifadə, yüksək qrafikalı oyunlar oynamaq və eyni anda enerji doldurmaq cihazın temperaturunu artırır. Alimlər bildirirlər ki, yüksək temperatur litium-ion batareyalarda kimyəvi aşınmanı sürətləndirir və onların ümumi istifadə müddətini azaldır.
Bundan başqa, keyfiyyətsiz və sertifikatsız adapterlərdən istifadə həm batareyaya, həm də telefonun digər hissələrinə zərər verə bilər. Orijinal və ya təhlükəsizlik standartlarına cavab verən aksesuarlar cihazın daha təhlükəsiz işləməsini təmin edir.
Ekspertlər telefonun batareyasının ömrünü uzatmaq üçün bir neçə sadə qaydaya əməl etməyi məsləhət görürlər: cihazı həddindən artıq istidən qorumaq, yalnız etibarlı enerji doldurma avadanlıqlarından istifadə etmək, batareyanı tam boşaltmamaq və proqram təminatını mütəmadi yeniləmək. Kiçik görünən bu vərdişlər uzun müddətdə həm batareyanın, həm də telefonun ümumi performansını qorumağa kömək edir.
Mələk Nəsirli
